安日新聞部
歡迎嚟到2023年第一篇安日新聞報道。
每逢一月嘅第二個禮拜一，日本全國都會有一個叫成人之日（成人の日）嘅公衆假期。
呢一日主要係為一班剛達到法定年齡嘅年輕人而設。
喺呢一日，每一個市嘅市政府都會發出一張邀請卡俾市内剛成年嘅人去參加一個叫成人式嘅典禮。
成人式主要包括一起唱歌同埋會有市長出嚟講一啲祝賀嘅説話。
日本目前嘅法定成人年齡係20歲。
日本政府早前公佈將會喺今年四月將法定年齡調降至18歲，意味住下年18歲嘅年輕人都可以參加成人式啦。
將法定年齡調降一事引起極大爭議，先有市民向伊賀市提出反對以及要求廢除方案。更有一個叫「為伊賀市未來思考會」(原名：伊賀市の未来を考える勉強会）嘅市民組織喺2022年10月集齊超過7500人簽名要求法定年齡維持喺現時嘅20歲。
隨住法定年齡下降，被選中成爲裁判員嘅機會都會落喺一啲仲讀緊中學嘅年輕人身上。
NHK就此向1000名17至19歲嘅高中生做咗一項調查，發現近半數（48.1%)中學生都唔想成爲裁判員，只得3成（28.1%）人左右願意做裁判員，而23.8%人表示冇意見。
報告更指出高中生最主要嘅憂慮都係因爲自己人生經驗不足同埋法律知識薄弱而怕做錯判斷。
因此多間日本學校已經開始提供一啲法律課堂以及前裁判員分享會，但係呢次日本政府嘅操作依然係被受爭議。
