Onday News 2 | 安日生活

安・趣 (二)

安日新聞部

おはようございます！冇錯，又係我嚟報道本周特別新聞。又到聖誕，又到聖誕~ 唔知大家會唔會買聖誕節禮物送俾家人同朋友呢？準備買嘅你唔知又會洗幾多錢嚟買禮物呢？著名日本模型玩具公司BANDAI今年對600名3至12歲兒童嘅家長做咗一項有關聖誕節洗費嘅調查。調查指出今年日本家長平均願意花7961円(約468.19港元) 喺聖誕節禮物上。呢個數字比起上年8876円(約522港元) 稍微下降1成。最多人選擇的預算範圍係4000円至6000円（約235.33至353港元），而願意花超過1萬円（約588.34港元）嘅家長不到百分之25.9。除此之外，小朋友最想收到的禮物居然係電腦游戲! 呢個調查可以睇出日本近年節約消費的態度同實體玩具慢慢被電腦游戲取代的趨勢。

冷知識時間～　豆知識タイム～

豆知識(まめちしき)(Ma-Me-Chi-ShiKi)係日文裏面一個比較常見的詞彙，意思同冷知識相若。大家都可能唔知道日本聖誕節有個比較特別嘅傳統，呢個傳統就係去KFC買炸雞食啦。大家應該都好好奇點解日本人會係聖誕節咁特別嘅日子特登去食快餐咁奇怪呢？其實日本KFC嘅聖誕節套餐一啲都唔普通，最貴嘅燒雞套餐可高達6200円（約364.91港元）。但係特別嘅套餐以及宣傳都唔係KFC成爲日本聖誕必食嘅主要原因，最主要係來至一個大話。 KFC喺1970年代先正式成立日本第一間分店，開頭生意並唔好。有一年，當時擔任店長嘅大河原毅收到多間學校喺聖誕節期間訂炸雞以及搵人扮聖誕老人到學校嘅要求。於是大河原毅靈機一觸就諗到借住聖誕節嚟做宣傳，希望提高生意額。但係當時嘅日本喺聖誕節冇公衆假期而且原本就冇慶祝聖誕嘅習慣。於是大河原毅就在日本放送協會（NHK）嘅一段訪問裏指話喺聖誕食炸雞係外國的傳統呢個大話，而唔係火雞。呢個講法從此就被廣汎流傳成爲日本一個特別嘅聖誕傳統，而KFC就成爲咗呢個大話最大嘅得益者。如果你有機會喺日本過聖誕嘅話，記得要試試食KFC呢個傳統啦~

極速5厘米日語教室

Good morning class，今日聖誕節就由啊Sir我教翻句常用嘅日文俾大家旁身。 -「メリクリ」(MeRi KuRi) 注意翻呢個字全部都係用「片仮名(かたかな)」(KaTaKaNa)寫，通常片仮名寫嘅日文字都係一些由外語直接譯音而成嘅日文字。「メリクリ」(MeRi KuRi) 其實係原至英文嘅Merry Christmas。你可能會問點解Merry Christmas 會讀到得翻 MeRi KuRi 幾個音咁奇怪，咁係因爲日文有將外語簡化嘅習慣。「メリクリ」(MeRi KuRi) 嘅全寫其實係「メリークリスマス」(MeRi- KuRiSuMaSu)。但係因爲「メリークリスマス」(MeRi- KuRiSuMaSu) 讀音太長，所以大部分人都會講比較順口嘅「メリクリ」(MeRi KuRi)。今個聖誕記得同身邊嘅家人同朋友講翻聲「メリクリ」(MeRi KuRi) 啦！