3.11大地震後面的十二年，可能大家都以爲過咗咁耐當年受到影響嘅人都應該可以重新開始回到以前嘅生活了吧。。。
可惜事實并唔係如此，至今死亡及失蹤人士纍計高達22,212人，因核事故同埋家園受到破壞導致無家可歸嘅人更係數以萬計。日本官方數字估計呢啲避難者人數大概有30,884人，遍佈全國47個都道府縣嘅唔同角落。
至到2021年所有搜救以及復興嘅開支高達31兆5000億円(約1.83兆HKD)。
另外受影響人士嘅心裏健康問題亦都係一個值得關注嘅問題。根據厚生勞動省嘅官方數字因3.11地震而自殺嘅人有248人。除此以外因地震影響而要入住災害公營住宅嘅人士更出現「孤獨死」嘅現象。至2022年底總共有465名入住人士死於「孤獨死」，大多數係60歲以上嘅金齡人士。
當然咁大型嘅自然災害帶嚟心裏創傷唔只「孤獨死」咁簡單，其他值得關注問題包括創傷後壓力症(PTSD)，適應障礙，歧視問題，喪偶/家人/親人之痛等。
如果大家有睇新海誠新作「鈴芽之旅」都可以更深一層瞭解到呢啲問題，因爲故事嘅女主角就係因3.11地震而被逼搬遷到其他城市生活嘅避難者之一。
其實「孤獨死」（孤独死／こどくし／Kodoku Shi）并非只是因3.11而導致嘅日本社會問題。
*又可以稱為 koritsushi こりつし (孤立死) 或 dokkyoshi どっきょし (独居死)*
「孤獨死」主要都係指獨居老人到晚年被家人忽略而導致老年抑鬱等問題，最終孤獨地在家中離去。
其實人口老化問題都嚴重嘅香港都有呢個問題，希望大家睇完呢篇文記得俾多啲關注及時間陪家人。
即使大家生活再忙，也許一句問候或者一通電話都可以減少「孤獨死」呢個社會問題。
