原來不經不覺當年嘅日本3.11東北大地震已經係12年前嘅事，相信有好多朋友對呢次天災依然記憶猶新。 雖然十多年過去，但好多問題依然未能解決，例如好多地區及房屋仍然需要重建，及議論紛紛嘅核污水處理問題。 上個禮拜提及到J-League開幕同埋日本近年足球嘅發展，所以我想將呢兩個禮拜嘅主題連同一起講，譯述翻當年日本足球如何與日本人度過大地震嘅難關。 今日嘅主角當然係我最愛嘅仙台維加泰(ベガルタ仙台、Vegalta Sendai)啦~ 仙台維加泰位於日本宮城縣嘅仙台市，屬於日本東北部最成功同埋最大嘅球會。 雖然係日本東北部最成功嘅球會，但其實成績一路都麻麻，多年來徘徊喺J2(第二級別聯賽)同埋J-League(最高級別聯賽)之間。 喺球會成立嘅35年嚟只贏過東北地區聯賽冠軍同埋一次J2冠軍(2009)。
2011年球季係仙台維加泰升班後嘅第二個球季，2010球季球隊先啱啱逃過一劫，以6分避過降班漩渦。所以嚟到新嘅球季大部分人都唔睇好仙台維加泰繼續留喺J-League。但係一開季仙台維加泰嘅表現就令人另眼相看，悅目嘅踢法加上傳奇教頭 手倉森 誠 嘅帶領之下，仙台維加泰嘅J1生存之路開始變得有睇頭。 可惜一個歷史性大災難嘅到來就摧毀了一切美好嘅前景，突然之間足球已經變得唔重要。最重要係儘快救出生還者同埋重建家園。球會全體包括球員，工作人員，以及球迷亦都立刻參與救援工作。球場就變身成爲避難所，提供飲食同埋一個溫暖嘅容身之處。這些將仙台維加泰和全東北人們嘅心連埋一起。 2011年4月23號聯賽重新開始，仙台維加泰作客川崎前鋒（川崎フロンターレ，Kawasaki Frontale)，大批仙台球迷跟隨球隊湧去東京睇比賽。 比賽開始前3500名仙台球迷含著淚喺雨中手牽手大聲高唱Country Roads，密麻麻嘅黃色人群中都能見到橫額大大隻寫住「感謝所有嘅同伴。直至能夠重立返家園爲止我哋都唔會輸！」(全ての仲間にありがとう。故郷を取り戻すまで俺たちは負けない！)。 奇蹟發生了，仙台戲劇性地喺最後一分鐘以2-1反勝對手。大家唔好以爲個奇蹟就喺呢到就完結，跟住嚟先係奇蹟嘅開始。
接下來嘅比賽，仙台維加泰真係好似唔識得輸咁，突然之間成爲爭標熱門，一支箭飆上第一位。如下13場比賽裏面只輸一場，但最終都係只能以第四名結束球季嚟報答球迷們一路嘅支持。 2012年球季，仙台維加泰再接再厲，再度挑戰聯賽冠軍。雖然球會曾登上榜首位置，但最終飲恨而終，只能屈居亞軍。連續兩年打破球會歷來最佳成績記錄。雖然失落錦標，但贏得全世界球迷嘅掌聲! 雖然最終都冇辦法畫上完美句號，但球會上下嘅努力同埋球迷嘅齊心都成就咗一個獨一無二嘅故事。 希望大家無論遇到甚麽問題都好，一定唔好放棄！因爲一路都有好多人喺身後默默支持你，奇跡必定會出現。雖然結果未必如意，但最近要要享受過程！ 小弟曾經喺2019年親身到仙台主場睇過比賽，仙台維加泰嘅氣氛真係好似有種特別嘅魔力，奇妙得難以形容。所有球迷都可以又跳又唱足全場。上面有條過百萬觀看次數嘅YouTube片，希望透過片段大家都可嘗試去感受下仙台維加泰嘅氣氛啦~ 下面我都會加條關於仙台維加泰同3.11地震嘅紀錄片，條片大約8分鐘。有興趣嘅朋友有時間都留一下。
