上個周末日職聯(J-League)終於翻嚟啦！！
🎉🎉
啱啱上個禮拜六舉行咗多場第一輪比賽，揭幕戰有衛冕冠軍橫濱水手(横浜F・マリノス，Yokohama F. Marinos)大戰上届亞軍川崎前鋒（川崎フロンターレ，Kawasaki Frontale)。
呢場波真係夠曬精彩同戲劇性，又有紅牌又有補時入波（Sor9ly 劇透）。
最終比賽係由作客嘅衛冕冠軍橫濱水手以2-1勝出全取三分，為衛冕之旅展開完美嘅序幕~
除咗緊凑嘅比賽之外，今年J-League嘅球星亦都值得留意。
講到球星當然要講2010年世界杯決賽入波功臣恩尼斯達（Andrés Iniesta），今季嚟到佢效力神戶勝利船（ヴィッセル神戸，Vissel Kobe）嘅第5個球季。
恩尼斯達亦曾經帶領球隊贏得2020年日本超級盃，希望小白可以繼續交出高水平嘅表現。
🏆🏆
另一位值得留意嘅球員係相隔13年重返母會大阪櫻花（セレッソ大阪，Cerezo Osaka）嘅前多懞特以及曼聯球星香川 真司。相信好多fans都會期待佢回歸J-League嘅表現。
😍 😍
第3組別聯賽J3亦都有香港代表歐陽耀沖效力岩手盛岡仙鶴（いわてグルージャ盛岡，Iwate Grulla Morioka）值得關注。
近年日本有多位日本球星由J-League遠闖歐洲都爭取到好表現，加上2022年世界杯嘅好成績，呢個代表住日本青訓嘅成功同埋J-League水準嘅提升。
出名外流球員包括今季喺英超紅爆嘅秘密武器三笘 薫(aka：攞你命3000），遠藤 航，板倉 滉，冨安健洋等。
當然唔少得「永遠的新星」，現年55歲嘅世界最年長職業足球員，三浦 知良。佢今年又再外闖外借到葡萄牙第2組別聯賽葡甲繼續追隨自己嘅足球夢~
唔大家今年會撐日職邊隊或者邊個球員呢？
我就一定係仙台維加泰（ベガルタ仙台、Vegalta Sendai), 因爲小弟曾經去過仙台留學。希望球隊可以由J2早日重返J1(雖然已經失望咗一年😔）。
